مشہور دوا ساز کمپنی نےکرونا ویکسین کی دستیابی کے حوالے سے حوصلہ افزا خبر سنا دی


بڑی امریکی دوا ساز کمپنی نے حوصلہ افزا خبر دی ہے کہ اگلے ماہ کے آخر میں کمپنی کی جانب سے کرونا ویکسین کی دستیابی کی منظوری کے لیے درخواست دی جائے گی۔

 امریکی فارماسیوٹیکل کمپنی فائزر نومبر کے آخر میں کرونا وائرس ویکسین کی منظوری کے لیے درخواست دے گی، کمپنی کا کہنا ہے کہ یہ درخواست ویکسین کی امریکا میں ہنگامی دستیابی کے لیے دی جائے گی۔

امریکی دوا ساز کمپنی اس وقت جرمن شراکت دار BioNTech کے اشتراک سے ویکسین کی حتمی تیسرے مرحلے میں آزمائش کر رہی ہے، کمپنی کے چیئرمین البرٹ بورلا کا کہنا تھا کہ ویکسین کے عوامی استعمال کے لیے تین کلیدی شرائط درکار ہیں اور فائزر ان شرائط کو پورا کرنے والی ہے۔

البرٹ بورلا کا کہنا تھا کہ ویکسین کا محفوظ اور مؤثر ہونا ضروری ہے، اور اس کی تیاری مستقل بنیادوں پر اعلیٰ ترین معیارات کے تحت ہونی چاہیے، ہم رواں ماہ کے آخر تک جان سکیں گے کہ آیا یہ ویکسین مؤثر ہے۔

انھوں نے امید دلائی کہ کمپنی کرونا وائرس ویکسین کے محفوظ ہونے سے متعلق درکار تفصیلات امکانی طور پر نومبر کے تیسرے ہفتے تک حاصل کر سکتی ہے، حفاظتی معیارات مکمل کرنے کے بعد کمپنی ایف ڈی اے انتظامیہ کو اس کی ہنگامی منظوری کے لیے درخواست دے گی۔

واضح رہے کہ دنیا میں تیاری کے مراحل طے کرنے والی ویکسینز میں فائزر کی ویکسین سر فہرست ہے، امریکی صدر ڈونلڈ ٹرمپ کئی بار دعویٰ کر چکے ہیں کہ کرونا وائرس کی ویکسین 3 نومبر کے صدارتی انتخاب سے قبل دستیاب ہو جائے گی۔




Source link

Leave a Reply

Your email address will not be published. Required fields are marked *